Sunday, March 3, 2024
Homeआर्थिकहर्बो ठगको स्वागत, अर्बौं ठगी फरार जिबि राईसँग गोप्य भेट !

हर्बो ठगको स्वागत, अर्बौं ठगी फरार जिबि राईसँग गोप्य भेट !

काठमाडौं । सहकारी बचतकर्ताको १६ अर्ब भन्दा बढी रकम हिनामिना गरि ठगी गरेको आरोप लागेका ग्यालेक्सी टेलिभिजनका मालिक गितेन्द्र बाबु राई फरार छन् । उनी विरुद्ध प्रहरीले ईन्टरपोल मार्फत डिफ्युजन नोटिस जारी गर्न पत्राचार गरिसकेको छ । हालसम्म यो हिसाब १६ अर्ब मात्रै आएपनि उनीद्वारा संचालित विभिन्न सहकारीहरुको ठगीको रकम ४५ अर्बसम्म पुग्नसक्ने अनुमान छ ।

पोखराको सुर्यदर्शन सहकारीको १ अर्ब ११ करोड हिनामिना प्रकरणमा सहकारीका कोषाध्यक्ष तथा ग्यालेक्सी टेलिभिजनका प्रबन्ध निर्देशक कुमार रम्तेल पक्राउ परि कारागार चलान भइसकेका छन् । सहकारीका पदाधिकारीहरु कैलाश मगर, महेन्द्र भोटे भनिने शिव बहादुर गुरुङ्ग र आइटि अफिसर भविश्वर अर्याललाई जेल चलान गरेको छ ।
ठगीका मतियारलाई पक्राउ गरेपनि मुख्य अभियुक्तलाई पक्राउ गर्न भने प्रहरी असफल भएको छ । अभियुक्तको हुलिया र तस्विर नै सामाजिक संजाल र विभिन्न माध्यम मार्फत सार्वजनिक हुँदा पनि पक्राउ गर्न सकिएको छैन । त्यसो त राई प्रहरीकै सेटिङ्गमा अदालतमा हाजिर हुने तरखरसमेत मिलाई रहेका छन् । यसरी नै सेटिङ्ग मिलाएर महेन्द्र भोटे पनि कास्की जिल्ला अदालतमा हाजिर भई कारागार चलान भएका पात्र हुन् ।

बचतकर्ताको रकम हिनामिनामा प्रत्यक्ष संलग्न भएपनि राष्ट्रिय स्वतन्त्र पार्टीका सभापति रवी लामिछानेबारे प्रहरीले अनुसन्धान समेत नगरि प्रतिवेदन बुझाएको छ । तत्कालिन ग्यालेक्सी टेलिभिजनका प्रबन्ध निर्देशक र संचालक समेत रहेका लामिछानेकै पालामा सहकारीको करोडौँ रकम टेलिभिजनमा ट्रान्सफर भएको थियो । तर, उनीपछि सेयर किनेको देखिएका कुमार रम्तेल भने कारागारमा छन् । जिल्ला अदालत कास्कीले ०८० भदौ २४ मा सूर्यदर्शन सहकारीका अध्यक्ष जीबी राईसहित ७ जनाविरुद्ध पक्राउ पुर्जी जारी गरेको थियो ।

जीबी राई अध्यक्ष र रवि लामिछाने प्रबन्ध निर्देशक रहेको गोर्खा मिडिया नेटवर्क प्रा.लि. मा साहारा चितवन सहकारीबाट समेत ११ करोड ७१ लाख लगानी भएको खुलेको छ । धितो नै नराखी निकालिएको झण्डै १२ करोड रुपैयाँ जीब्ी राई र रवि लामिछानेले फिर्ता नगरेको प्रमाण पनि बाहिरिएका छन् । अहिले सञ्चालक नै फरार भएपछि ८ हजार सर्वसाधारण करिब एक वर्षदेखि संघर्षमा रहेका छन् । यतिबेला सर्वसाधारणको बिचल्ली बनाएर राई फरार छन् भने बचतकर्ताले आवाज उठाउँदा पनि लामिछाने मौन छन् ।

को हुन् जीबी राई ?

फरार राई कुनै समय सबभन्दा ठूलो नेटवर्किङ व्यवसाय हर्बो इन्टरनेसनलका एक साझेदार थिए । सो कम्पनीमा रहँदै गर्दा उनले २०६६ सालमा गोर्खा ग्रुप अफ कम्पनी खोलेको थिए । सरकारले नेटवर्किङ व्यवसायमा २०६८ मा प्रतिबन्ध लगायो । त्यसपछि नेपालमा हर्बो बन्द गरी त्यही नेटवर्कलाई प्रयोग गरेर देशभर करिब एक दर्जन सहकारी सञ्चालनमा ल्याए । तिनै सहकारीमा सर्वसाधारणले जम्मा गरेको रकम दुरुपयोग गरी नेचर हर्ब्स, नेचर नेस्टलगायतको नाममा नेपालसहित ७ देशमा नेटवर्किङ व्यवसाय चलाइरहेका छन् । गोर्खा ग्रुप अफ कम्पनीका अध्यक्ष कुमार रम्तेलले आफ्नो समूहले सातवटा सहकारी सञ्चालन गरिरहेको स्वीकार गरेका छन् । ती संस्थामध्ये ३ अर्ब रुपैयाँ निक्षेप रहेको स्वर्णलक्ष्मी बहुउद्देश्यीय सहकारी संस्था, काठमाडौंको अध्यक्ष जीबी राई आफैं हुन् भने कुमार रम्तेल कोषाध्यक्ष छन् । उपत्यका बाहिर पोखराको सूर्यदर्शन बचत तथा ऋण सहकारी, बुटवलको सुप्रिम बचत तथा ऋण सहकारी, नेपालगञ्जको समानता बचत तथा ऋण सहकारी, चितवनको सहारा चितवन बचत तथा ऋण सहकारी र वीरगञ्जको सानो पाइला बचत तथा ऋण सहकारी संस्था पनि यही समूहको हो । सुप्रिम बचत तथा ऋण सहकारी संस्थाको पूर्वसचिवमा पूर्वउराष्ट्रपति नन्दकिशोर पुनका छोरा दिपेश पुन छन् ।

तीनवटा सहकारी संस्थामा जीबी राई आफैं अध्यक्ष छन् भने कुमार रम्तेल ४ वटामा । जबकि सहकारी ऐन– २०७४ मा एउटा व्यक्ति एक समयमा एउटा मात्रै संस्थाको सञ्चालक हुनसक्ने व्यवस्था छ । तर, यो समूहले संघ, प्रदेश र स्थानीय तह फरक–फरक नियामकअन्तर्गत सहकारी दर्ता गरेर सरकारलाई समेत झुक्याएको देखिन्छ । नेपालभरि विभिन्न नाममा सहकारी संस्थाहरु सञ्चालनमा रहे पनि त्यसको सबै नियन्त्रण जीबी राईसँगै हुने गरेको सरकारी नियामक निकायहरुकै अनुगमनका क्रममा खुलेको छ ।

कहाँ छन् मुख्य आरोपी जीबी राई ?

प्रहरीको थुनामा रहेका शिवबहादुर गुरुङ र भविश्वर अर्याल सोमबार आफैँ अदालतमा हाजिर भएका थिए । सहकारीका कोषाध्यक्ष कुमार रम्तेललाई भने प्रहरीले पहिलो पटक २४ साउनमा पक्राउपुर्जी जारी भएपछि पक्राउ गरेको थियो । उनीसँगै पक्राउपुर्जी जारी भएका सहकारीका मुख्य आरोपी जीबी राई भने अझै फरार छन् । उनी ६ महिनाअघिदेखि नै प्रहरीको फरार सूचीमा छन् । कहिले पोखरा महानगरपालिका–१७ घारीपाटन त कहिले काठमाडौंको धापासी बस्दै आएका ओखलढुंगाका जीबी अहिले भने लुकेर बसेका बताइएको छ ।

स्रोतका अनुुसार राईले सहकारीको रकमबाट रुपन्देहीमा ४० बिघा जग्गा खरिद गरेको देखिएको छ । त्यस्तै ललितपुर, भक्तपुर र काठमाडौंमा समेत उनले करोडौं पर्ने जग्गा खरिद रहेको खुलेको छ । ती सबै पोखरा प्रहरीले किनबेच नहुने गरी रोक्का गरिसकेको छ ।

उनलाई पक्राउका लागि खोजी गरेको पोखरा प्रहरीले नभेटेपछि उनको खोजीका लागि केन्द्रीय अनुसन्धान ब्युरो (सीआईबी)लाई समेत पत्राचार गरेको थियो । तर राई अझै भेटिएका छैनन् । राई नेपाल छोडेर विदेश भागेको आशंका गरिएको छ । उनी मलेशियामा लुकेर बसेको आशंका छ । मलेशियाको क्वालालाम्पुरमा नेचर हब नामक नेटवर्किङ्ग कम्पनिको कार्यालय छ । क्वालालाम्पुरको जलान राजा चुलानस्थित रहेको मिनेरा अलम्पिया नामक महलको २१ औँ तलामा रहेको कार्यालय मार्फत उनले नेटवर्किङ्गको धन्दा चलाउँदै आएका छन् । सोही कार्यालयका राई थरकै केही व्यक्तिले उनलाई मलेशियामै एउटा घरमा लुकाएर राखेको स्रोत बताउँछ ।

रवि–जिवि सम्बन्ध : मलेशियामा रहस्यमयी भेट

तत्कालिन ग्यालेक्सी टेलिभिजनका प्रबन्ध निर्देशक रवि लामिछाने र सहकारी ठगीका अभियुक्त तथा अध्यक्ष गितेन्द्र बाबु राईबीचको सम्बन्ध ओपन सेक्रेट छ । लामिछानेले यो सम्बन्धलाई ओझेलमा पार्ने कोशिस गरेपनि ठगीमा दुईबीचको नाता झनै कस्सिएको देखिन्छ । पछिल्लो समय ठगीबारे प्रहरीले राईसहित १९ जनालाई पक्राउ पुर्जी जारी भएपछि लामिछाने र जिवि राईबीच मलेशियामै भेट भएको तथ्य दियोपोस्टलाई प्राप्त भएको छ ।

मलेशियास्थित विशेष स्रोतले दिएको जानकारी अनुसार गत डिसेम्बर ३ मा मलेशिया यात्रमा निस्केका लामिछानेले राईलाई मलेशियामै भेटेका थिए । उनीहरुको भेटघाटको चाँजो पाँजो भने मलेशियास्थित जिबि राईकै कम्पनिमा कार्यरत केही कर्मचारीले मिलाएका थिए ।

लामिछानेलाई विमानस्थलमा लिन जाने व्यक्ति नै सहकारी ठगीका अभियुक्त राईले संचालन गरेको नेचर हब ईन्टरनेश्नलमा कार्यरत हेमराज सापकोटा थिए । राई र लामिछानेबीचको भेटमा लामिछानेले नै हाल समस्याग्रस्त बनेको ग्यालेक्सी टेलिभिजन जिम्मा लिएर संचालन गरिदिनुपर्ने प्रस्ताव राईले गरेको उच्च स्रोतले दियोपोस्टलाई बतायो । तर, भेटघाटको चाँजोपाँजो मिलाउने व्यक्तिहरु भने यो विषयमा मुख खोल्न चाहाँदैनन् । राईले मलेशियामा सकेन्ड होम लिएका छन् । मलेशियाको केएलसिसि टावरको आसपास उनले घर र गाडीसम्म जोडेको स्रोत बताउँछ ।

राईको नेटवर्किङ्ग धन्दामा संलग्न अधिकांश व्यक्ति स्वतन्त्र पार्टीका कार्यकर्ता

लामिछाने मलेशियामा पुगेपछि राष्ट्रिय स्वतन्त्र पार्टीको पक्षमा आयोजित कार्यक्रमको संचालक नै हेमराज सापकोटा थिए । उनी ठगीका फरार अभियुक्त राईकै कम्पनिमा कार्यरत व्यक्ति हुन् । सापकोटा उनी मलेशिया एनआरएनएका उपाध्यक्ष पनि हुन् । उनी नेचर हबका पनि सेकेन्ड डाइरेक्टर हुन् । लामिछानेले हालै मलेशियामा गठन गरेको प्रवासी नेपाली सम्पर्क विभागको सचिवमा पनि उनै सापकोटा छन् । मलेशियामा ग्रिन टि र साबुन राखेर सदस्य बनाउँदै ठगी धन्दा चलाउँदै आएका सापकोटा नेपालबाट भने एउटा ठगीकाण्डमा फरार भएका व्यक्ति हुन् ।

नेटवर्किङ ठगी आरोपमा नेपालबाट फरार हेमराज सापकोटा

कुनै समय नेपालमा पिरामिड शैलीको ठगीधन्दा चलाएको आरोपमा हर्बो ईन्टरनेश्नल नामक कम्पनिमाथि प्रहरले अपरेशन चलाएको थियो । शुल्क उठाउने, आकर्शक उपहार र कमिशनको प्रलोभन देखाएर पिरामिड शैलीमा ठगी गरेको आरोपमा त्यतिबेला सापकोटा, जिबि राई लगायत व्यक्ति प्रहरीको खोजी सुचीमा थिए । युनिटी हर्बो जस्ता कुख्यात ठगीकाण्डसँगै नेपालमा नेटवर्किङ्ग शब्द नै चर्चामा थियो ।

नेटवर्किङ ठगी आरोपमा नेपालबाट फरार हेमराज सापकोटा सचिव पदमा निर्वाचित भएकाे जानकारी

नेचर हर्ब्स इन्टरनेसनल प्रालि पछिल्लो २ दशक अवधिमा विभिन्न कम्पनीका नाममा नेटवर्किङ व्यवसाय चलाएर ठगी कार्यमा संलग्न देखिएका गिरोहबाट सञ्चालित छ भने यो कम्पनीमा हाई प्रोफाइल व्यक्तिहरुको संलग्नता पनि बढी देखिन्छ । यसका सञ्चालक तथा सहकारी ठगीका अभियुक्त जिबि राई उनकै नातेदार अनन्तबाबु राई र श्रीमती निशा राई पनि यो कम्पनीको उच्च ओहोदामै छन् ।

 

अवैध नेटवर्किङ धन्दामा पक्राउ परेका पुष्पराज पुरुष भनिने व्यक्तिसँगै हेमराज सापकोटा

निर्देशकका रुपमा नेत्रपाणि बाँस्तोला, ट्रेनरका रुपमा कुमार रम्तेल र बजार विभागको जिम्मेबारी माधव खनालले हेर्छन् । यी सबै व्यक्तिहरुको विगत हर्बो, युनिटी र गोल्डक्वेस्टसम्म जोडिन्छ । गोलक्वेस्ट ठगी प्रकरणमा पक्राउ परेका अभियुक्त पुष्पराज पुरुष भनिने व्यक्तिसँगै हेमराजको पनि नेटवर्किङ्ग धन्दाको सम्बन्ध जोडिएको थियो । हेमराज हर्बो ठगीका ठूला अभियुक्त हुन् । उनै हेमराज अहिले मलेशियास्थित राष्ट्रिय स्वतन्त्र पार्टी हर्ताकर्ता बनेका छन् ।

 

यी हुन् पक्राउपुर्जी जारी भएका १९ आरोपी

१) सूर्यदर्शन सहकारीका सस्थापक अध्यक्ष– गितेन्द्र बाबु राई
२) सहकारीका पूर्वउपाध्यक्ष– कैलाश दर्लामी
३) सहकारीका सचिव– धिरजकुमार दास
४) सहकारीका कोषाध्यक्ष– कुमार रम्तेल
५) सहकारी संचालक समिति सदस्य– हेमन्त अधिकारी
६) सहकारी संचालक समिति सदस्य– प्रमोद भट्टराई
७) सहकारी संचालक समिति अध्यक्ष– थानबहादुर बुढा मगर
८) सहकारी संचालक समिति पूर्वसचिव– अनुज नकर्मी
९) सहकारी संचालक समिति पूर्वअध्यक्ष– भूपेन्द्र राई
१०) सहकारी संचालक समिति पूर्वसदस्य– शिवबहादुर गुरुङ
११) सहकारी संचालक समिति सदस्य– भविस्वर अर्याल
१२) सहकारी संचालक समिति सदस्य– आइस्मा गुरुङ
१३) सहकारी संचालक समिति सदस्य– कविता तामाङ
१४) सहकारीका संचालक समिति सदस्य– सागर केसी
१५) सहकारीका संचालक समिति सदस्य– ललिता तामाङ
१६) सहकारीका संचालक समिति सदस्य– दिनेश रोका
१७) सहकारी संचालक समिति लेखा अधिकृत– सृष्टी मानन्धर
१८) सहकारी संचालक समिति लोन अधिकृत– बुद्धि गुरुङ
१९) सहकारी संचालक समितिका पूर्वसचिव– सुरज श्रेष्ठ

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments